Dalin të tjera informacione nga operacioni “Laboratori”, ku u sekuestruan 1800 gram heroinë dhe 200 gram kokainë. Burime nga policia tregojnë se koka e grupit është Florian Nurja, 30 vjec, i cili njihet me pseudonimin “Loli i verës”.
Ai bashkëpunonte me 27-vjeçarin Pieraldo Pelushi, i njohur edhe me pseudonimin ‘Pipo’. Te dy këta persona kishin përshtatur një apartament në ‘Rrugën e Kavajës’, ku përpunonin lëndën narkotike dhe e ndanin në doza me të vogla, dhe me pas ua shpërndanin shpërndarësve të dorës së dytë.
Ata u ndaluan nga policia, teksa ishin duke udhëtuar me një automjet, brenda të cilit kishin 4 peshore elektronike. Pas kontrollit të banesave, u gjetën edhe lëndë narkotike. Në pranga ranë dhe 3 persona të tjerë që kishin dijeni se në apartament përpunohej drogë, por nuk e kishin denoncuar këtë në polici.
Ky grup, heroinën dhe kokainën e shpërndanin në Selitë, ‘Rrugën e Kavajës’, në zonën e ish-parkut, Kombinat dhe Yzberisht, pasi aty kishin dhe pikat e tyre te kontaktit.
