Zbardhen detaje të reja në lidhje me aksionin e Task Forcës, që sekuestroi 300 kg kokainë brenda një kamioni në portin e Durrësit.
Mësohet se 40-vjeçari i arrestuar, është identifikuar si Nazif Ajrofksi, i cili ka dëshmuar se është thjesht një punëtor i cili transporton materiale ndërtimi, dhe nuk kishte dijeni për lëndën narkotike.
Kamioni me targa maqedonase dhe shoferi, ndodheshin në Shqipëri prej dy ditësh, dhe raportohet se destinacioni i rradhës ishte Napoli i Italisë. Por, cili ishte intenerari i ndjekur?
Kamioni është nisur fillimisht nga Belgjika, për të mbërritur në Serbi dhe më pas në Maqedoninë e Veriut.
Droga ishte vendosur në trup të kamionit, ndërsa ishte fshehur brenda pakove që mbanin logo të gjashtë markave të ndryshme nga “Chikago Bulls”, e deri te ekipi parisien “Paris Saint Germain”.
Çfarë deklaroi policia
Port, Durrës
Vijojnë goditjet e njëpasnjëshme ndaj veprimtarisë kriminale të trafikimit të drogave të forta.
Task Forca permanente e përbashkët e përbërë nga Policia Kufitare e Portit të Durrësit, Policia Kriminale e DVP Durrës dhe autoritetet doganore të Portit, evidenton dhe sekuestron rreth 300 kilogramë lëndë narkotike të dyshuar kokainë.
Arrestohet në flagrancë drejtuesi i mjetit me të cilin po transportohej lënda narkotike.
Si rezultat i kontrolleve të shtuara me qëllim parandalimin, evidentimin dhe goditjen e trafikimit të lëndëve narkotike, bazuar edhe në analizën e riskut të bërë nga Task Forca permanente e përbërë nga Policia Kufitare e Portit të Durrësit, Policia Kriminale e Drejtorisë Vendore të Policisë Durrës dhe nga autoritetet doganore të Portit, e cila vepron në Portin e Durrësi, në bazë të dyshimeve të krijuara nga kjo Task Forcë kanë kaluar për kontroll të detajuar në vijën e dytë në dalje një kamion transit me targa të Maqedonisë së Veriut.
Si rezultat i kontrollit të imtësishëm të ushtruar në kamionin që drejtohej nga një shtetas nga Maqedonia e Veriut, Task Forca gjeti të fshehur në trupin e kamionit, një sasi rreth 300 kilogramë lëndë narkotike të dyshuar kokainë, e cila u sekuestrua në cilësinë e provës materiale.
Në vijim të veprimeve, nga specialistët për Hetimin e Narkotikëve në Drejtorinë Vendore të Policisë Durrës u arrestua në flagrancë drejtuesi i kamionit, shtetasi N. A., 40 vjeç, banues në Maqedoninë e Veriut.
Grupi hetimor, nën drejtimin e Prokurorisë së Rrethit Gjyqësor Durrës vijon veprimet hetimore për dokumentimin e plotë kësaj veprimtarie kriminale, identifikimin dhe kapjen e personave të tjerë të përfshirë në të.
