Raundi i dytë për zgjedhjen e Presidentit të ri të Shqipërisë është “djegur” pa asnjë emër. Mbledhja e djeshme e Komisionit të Ligjeve ka zgjatur vetëm pak minuta, duke u ezauruar pa asnjë kandidaturë. Grupi parlamentar demokrat refuzoi që të propozonte kandidatura, ndërsa mazhoranca ka paralajmëruar se ato do të propozojnë emra vetëm në raundin e katërt dhe të pestë. Për rrjedhojë, kjo përplasje solli edhe ezaurimin e raundit të dytë.
Sot pritet që të mblidhet Konferenca e Kryetarëve, për të caktuar se kur do të zhvillohet seanca parlamentare për raundin e tretë sa i takon zgjedhjes së pasuesit të Ilir Metës.
Enkelejd Alibeaj konfirmoi se ai do të marrë pjesë në këtë mbledhje, për të kërkuar sërish përgjigje nga mazhoranca, nëse i qëndron dakordësisë së arritur në negociata.
Edhe në këtë raund opozita ka të drejtën e propozimit të kandidatit, sipas marrëveshjes mes të dyja palëve. Në rast të kundërt, mazhoranca ka deklaruar se do ta zgjedhë vetë Presidentin e ri.
