Kryetarja e Kuvendit të Kosovës, Vjosa Osmani, ka propozuar sot një amandament për shpenzimin e 3 milionë eurove nga buxheti i shtetit për t’i dhuruar qytetarëve maska falas.
Sipas saj, amandamenti i propozuar është bazuar në praktikat e disa vendeve të tjera.
“Në Belgjikë ta zëmë është vepruar mbi parimin që çdo qytetar do të marrë maska falas, në Francë janë dhënë maska shumëpërdorimshe për qytetarët”, ka thënë Osmani, duke kërkuar edhe mbështetjen e deputetëve.
Kërkoj mbështetjen tuaj në sigurimin e maskave shumëpërdorimshe, në vlerën prej 3 milionë euro, përkundër faktit që qeveria ka siguruar një kontingjent të maskave, e kanë konfirmuar se mund të bëhet shpërndarja e tyre, ne nuk e dimë edhe sa do të zgjasë kjo pandemi”, tha ajo.
Osmani theksoi se në momentin që maskat bëhen të detyrueshme, shteti duhet t’ia sigurojë qytetarëve falas.
“Shumë më e madhe është kostoja e shërimit se sa e parandalimit. Në mënyrë që t’i sigurojmë qytetarët me maska, sepse kur e obligon duhet edhe ta ndihmosh, ju ftoj që ta votoni këtë amendament që është i rëndësisë së veçantë ku ne do të duhej të mësohemi të jetojmë me virusin.
Projektet për vetura të blinduara, furnizimi me mobile dhe disa miliona për infrastrukturë, mbrojtja e jetëve është më e rëndësishme se çdo projekt tjetër”, shtoi ajo.
Mirëpo, propozimi i Osmanit dështoi që t’i marrë votat e deputetëve, pasi që ka marrë 28 vota pro, 37 kundër dhe 12 abstenime.
