Të rinjtë e sotëm përherë e më shumë i janë larguar shqipes standarde. Të shumta janë rastet ku fjalë të ndryshme i zëvendësojnë me terma të shkurtuara, si “flm” për faleminderit apo “tkxh” për të kam xhan. Tirana Today intervistoi disa të rinj, të cilët u shprehën se i përdorin shkurtimet për lehtësi dhe si një formë komunikimi me e lehtë me miqtë e vetë.
“Edhe kur shkruaj në rrjete sociale apo në mesazhe, jam e kujdesshme të shkruaj tamam, jo me shkurtime. Të rinjtë e sotëm janë bërë përtacë dhe nuk i shkruajnë tamam fjalët. Mendoj se tashmë ka ardhur koha e gjuhës “cool” dhe po lihet në harresë gjuha standarde.”
“Kur jam në mënyrë shoqërore, normal që përdor shkurtimet. Ndërkohë, kur është diçka më formale, e shkruaj tamam. Njerëzit kanë harruar shqipen, nuk dinë ta shkruajnë më.”
Por, në një test të bërë nga Tirana Today, të rinjtë “ngelën në klasë”. Të pyetur për fjalën mirë se vini, ata thonë se shkruhet bashkë. Si edhe fjala marrëdhënie, e cila sipas tyre shkruhet me një -r.
Kjo formë komunikimi nuk përdoret vetëm në rrjete sociale apo në komunikimin e përditshëm, duket se të rinjtë i përdorin edhe në shkollë. Sipas pedagogëve nuk janë të pakta rastet kur në detyrat e kursit apo provime, hasen me shkurtime të ndryshme, ndonjëherë edhe të pakuptueshme. TIRANA TODAY
