Drejtori i Rendit Publik, Albert Dervishi, në nisje të vitit të ri shkollor deklaroi se policia është në gatishmëri për të garantuar rendin dhe sigurinë.
Në një prononcim për mediat nga shkolla “1 Maji”, Dervishi tha se janë marrë masat për të ndaluar veprimtaritë kriminale në shkolla.
“Të gjithë punonjësit e policisë kanë qenë të planizuar në të gjitha shkollat 9-vjeçare dhe të mesme, me qëllimin e vetëm garantimin e rendit publik. Policia e Shtetit ka planifikuar një sërë detyrash këtë vit shkollor. Së pari, në parandalimin e çdo lloj veprimtarie kriminale që mund të zhvillohet në afërsi të shkollave apo edhe gjatë hyrjes në të, duke evituar hyrjen e personave që s’kanë lidhje me shkollat.
Kemi një projekt që prej 10 vitesh e ushtrojmë për ndërgjegjësimin dhe përdorimin e substancave narkotike, armëve të zjarrit apo bulizmit. Ky projekt do të vazhdojë, në mënyrë që të ndërgjegjësojmë brezin e ri”, u shpreh ai.
