Japonia është sot një nga vendet më të pasura në botë. Por 50 vitet e fundit, ajo ka një problem serioz me vdekjet e shumta, për shkak të orëve të tepërta në punë.
Që nga vitet 1970, japonezët përdorin termin “karoshi”, që do të thotë “vdekje nga puna e tepërt”. Vetëm në vitin 2019, mbi 1.940 japonezë kryen vetëvrasje për shkak të stresit dhe mbingarkesës në punë.
Shumë të tjerë, vdesin për shkak të goditjeve në tru apo sulmeve në zemër. Disa nga viktimat e “karoshi”-t, ishin duke punuar për më shumë se 110 orë në javë, dhe disa më shumë se 4.000 orë në vit.
Në një rast, një infermiere vdiq nga një sulm në zemër, pasi ajo kishte bërë 5 herë turnin 32-orësh brenda një muaji. Japonezët marrin më pak pushime vjetore, vetëm 10 ditë.
Arsyeja kryesore e mbingarkesës, shpjegohet me rritjen e shpejtë të Japonisë, pa pasur mjaftueshëm njerëz që punojnë. Pas çdo krize, kompanitë kanë shkurtuar stafet, pa ulur volumin e punës, duke ushtruar një presion ekstrem mbi punonjësit e tyre.
TIRANA TODAY
