Një ditë më parë në Kuvendin e Kosovës deputetja Flora Brovina publikoi një fotografi të dhunës seksuale të ushtruar ndaj femrave kosovare nga ushtarët serb gjatë luftës. Vasfije Krasniqi Goodman, e mbijetuara e dhunës seksuale, ka reaguar me anë të një statusi në Twitter për ngjarjen në fjalë.
“Mos e përdorni dhimbjen tonë dhe vuajtjet për përfitimin tuaj. Ma plasët zemrën”, ka shkruar Krasniqi në Twitter.
Fotografia e publikuar nga deputetja e Partisë Demokratike të Kosovës, tronditi opinionin në Kosovë e më gjerë. Brovina prezantoi atë që e cilësoi dëshmi fotografike të përdhunimit të një gruaje kosovare në kohë të luftës, nga ushtarët serbë, në sytë e familjes së saj.
Por, fotografia e shfaqur nga Brovina rezultoi të jetë aspak e vërtetë. S’është as nga lufta e Kosovës, e madje as nga ndonjë luftë tjetër.
Në të vërtetë, bëhet fjalë për një film pornografik, skenë të të cilit paraqet fotografia e prezantuar nga Brovina.
Gazeta Express ka raportuar dje se fotografia e publikuar nga Brovina nuk është e vërtetë, dhe se rrjedh nga një ueb-sajt me përmbajtje pornografike.
