Deputeti Ligoraq Karamelo, është shprehur se grekët e Epirit të Veriut po përballen me momente të vështira, për shkak të politikave që po ndjek kryeministri Edi Rama ndaj tyre.
Gjatë një interviste për Channel One në emisionin “Logos kai Antiologos”, Karamelo foli për atë që ai e cilëson si urrejtje kombëtare të shtetit shqiptar ndaj grekëve autoktonë të Epirit të Veriut.
“Nga njëra anë, Shqipëria dëshiron të anëtarësohet në Bashkimin Evropian pa përmbushur kriteret e anëtarësimit dhe nga ana tjetër ajo mban marrëdhënie të ngushta me Turqinë”, tha ai.
Ai pretendon se ekziston një marrëveshje midis Ramës dhe presidentit turk, Erdogan për të zhvendosur 30,000 refugjatë dhe imigrantë të paligjshëm nga Turqia për në Shqipëri, në Himarë, raporton JavaNews.al.
“Ne kemi nevojë për shumë përgatitje për regjistrimin sa herë që të ndodhë, sepse ne jemi një përqindje e madhe. Në regjistrimin e vitit 2011, 25,000 grekë e deklaruan veten në Korçë, por shteti shqiptar numëronte vetëm 2,000”, shtoi ai.
Ligoraq Karamelo është deputet nga lista Basha dhe përfaqëson qarkun e Korçës në Kuvendin e Shqipërisë.
