Ndonëse situata është drejt përmirësimit në Kosovë sa i takon situatës pandemike, nuk ka lehtësim të masave. “Mbuloni gojën dhe hundën me maskë! Mbani higjienën! Respektoni distancën!”, është thirrja që përsëritet çdo ditë nga autoritetet shëndetësore.
Si për të dhënë një shembull se ligji është i barabartë për të gjithë, policia e Kosovës ka ndëshkuar me një gjobë një deputet. Deputeti i Partisë Demokratike të Kosovës, Xhavit Haliti është gjobitur nga policia, pasi ka shëtitur pas maskë në sheshin kryesor të Prishtinës. Lajmin për gjobitjen e ka bërë publike vetë deputeti Haliti, me anë të një postimi në rrjetet sociale.
“Sot, derisa po kaloja në sheshin “Nënë Tereza” në Prishtinë, kisha harruar të vendosë maskën, dhe si rrjedhojë mora një gjobë nga Policia e Kosovës.
I ftoj të gjithë qytetarët që, në mbrojtje të shëndetit të tyre dhe të tjerëve, të bëjnë kujdes dhe mos të lëvizin pa maska mbrojtëse”.
