Në një prononcim për mediat, Ralf Gjoni, kandidati i LSI i cili u sulmua sot me bojë në hyrje të banesës së tij, u shpreh se një djalë i ri po e priste tek hyrja ndërsa i hodhi më pas bojë.
Më tej deputeti e cilësoi këtë si një rrugaçëri, ndërsa theksoi se në Kuvend nuk ka ardhur për të marrë rrogën, por për të përfaqësuar rininë.
“Dua të them se ai ose ajo që e kanë porositur këtë sjellje rruge, dua të them se unë jam këtu dhe do të betohem dhe do të përfaqësoj të gjithë ata të rinj”, tha ai.
I pyetur se kush mund ta ketë bërë, Gjoni tha se merret me mend.
“Ju besoj se e merrni me mend kush është. Tani unë dua të betohem dhe nuk kam ardhur të marr një rrogë të qelbur shteti. Unë jam një njeri që vij nga jashtë, jam i shkolluar, jam krenar për atë që kemi arritur, nuk do lejoj kurrë që emri im të keqpërdoret”, tha deputeti.
Më tej ai u pyet se do i bashkojë votat me qeverinë në Kuvend.
“Jeni në vete, mendoni se unë vij për t’i bërë fresk qeverisë?!”.
