Pas dorëzimit të mandatit në Kryesinë e Kuvendit, Kryemadhi ka mbërritur në selinë blu, ku ka zhvilluar një takim me kryetarin e PD-së, Lulzim Basha.
Pas takimit mes tyre, Kryemadhi foli për mediat, ku tha se pas dorëzimit të mandatit, ndihej e liruar nga kapja e çdo zinxhiri politik të lidhur me krimin.
E pyetur mbi deputetët që nuk do të dorëzojnë mandatet, Kryemadhi tha se kjo është çështje fryme dhe jo deputeti, ndërsa u tregua e ashpër teksa shtoi se “kush deputet do të përfundojë në kazan të plehrave si ata të Ukrainës, le ta provojë”.
Fjala e Kryemadhit:
Mesazhi është shumë i qartë, sot na dhanë më shumë energji për ta çuar deri në fund misionin dhe ndarjen përfundimtare me atë parlament në të cilin për 27 vjet shqiptarët kanë shpresuar se jemi në demokraci, por na ktheu mbrapsht. Sot, opozita dhe deputetët e opozitës janë të lira nga kapja e çdo zinxhiri politik që është i lidhur me krimin dhe më shumë se kurrë, ajo që ndjejnë deputetët dh unë është se më shumë se ç’të kushton liria nuk të kushton asgjë tjetër.
Grupi teknik po punon, por këtu nuk është çështje deputeti, këtu është çështje fryme. Kush deputet do të përfundojë në kazan të plehrave si ata të Ukrainës, le ta provojë. LSI, opozitën, shqiptarët nuk i mbajnë peng as inceneratorët, as tenderat, as vettingu dhe asgjë tjetër.
