Ish-deputeti demokrat, Tritan Shehu, ka vijuar denoncimet në sektorin e shëndetësisë, që sipas tij, është diskriminues deri në ekstrem.
Ish-deputeti shkruan në Facebook se “rilindja filloi me mashtrimin ‘shëndetësi falas’ dhe po e mbyll me një model afrikano-qendror, duke iu bërë padrejtësi qytetarëve, edhe kur bëhet fjalë për “jetë a vdekje”.
“Sistemi ynë shëndetësor, diskriminues deri në ekstrem. Rilindja filloi me mashtrimin “shëndetësi falas” e po e përfundon me një model Afrikano Qendror edhe për aspektin social, padrejtësive ndaj qytetarëve dhe kur bëhet fjalë për “jetë a vdekje” të tyre.
Në asnjë vend civil nuk ndodh që vetëm një numër i vogël qytetarësh, të cilët mund të paguajnë bollshëm, të mund të përfitojnë nga procedura ekstremisht urgjente, të suksesshme mjekuese, jetë a vdekje këto, që tek ne mund të realizohen vetëm në spital privat të vendit kundrejt pagesës direkte. Sot dua të përmend njërën prej tyre, trombektomine mini invazive arteriale cerebrale, gjë për të cilën ajo strukturë private duhet përgëzuar së bashku me mjekët e shërbimit universitar, që e realizojnë aty. Po për shumicën e popullsisë që nuk mund të paguajë….përfundimi është ose fatal, ose në rastet “fatlume” me pasoja invalidizuese, me kosto të lartë sociale e financiare.
Ku është shteti këtu, të drejtat e njeriut, e drejta Kushtetuese për shërbim mjekësor e Jete, ligji kundër diskriminimit etj, të shkelura tërësisht?! Është detyra Kushtetuese e Shtetit që të tilla proceduara jetësore e urgjente të mirë provuara, të bëhen të arritshme nga e gjithë popullsia, qoftë në spitalet publike, qoftë në ato private, por të rimbursuara.
Është detyra e sistemit publik shëndetësor të ngrejë të gjithë strukturën urgjente që ata pacientë të arrijnë të marrin gratis të tilla ndihma mjekësore, brenda afatit disa orësh për suksesin. Unë përmenda vetëm një procedurë mjekësore nga shumë të tilla të realizueshme, por që janë “mollë e ndalueme” për shumicën e shqiptarëve. Padrejtësi të tilla ekstreme ndodhin vetëm në vende të tipit të Afrikës Qendrore”, shkruan Shehu.
