Një javë pas tërmetit, aktorët politikë, herë drejtpërdrejtë dhe herë tërthorazi, kanë lëshuar akuza politike në drejtim të njëri-tjetrit. Ditën e sotme ka reaguar edhe ish-presidenti Bujar Nishani. Me anë të një postimi në facebook, ai ka folur për sistemin, modelin dhe mënyrën sesi sipas tij, mafia zotëron vendin.
Risia që do të ndryshojë botën. Testohet sistemi që mund të parashikojë tërmetet
Postimi i Plotë:
Kohët e vështira të pas-tërmetit po tregojnë edhe një herë më shumë sistemin, modelin dhe mekanizmin e mafies që është ndërtuar mbi këtë tokë.
Mu ashtu siç ishin ngritur mashtrimet e betonit të vjedhur për të zezën e shqiptarëve.
Kryepërgjegjësi i problemeve madhore që vuajnë shqiptarët sot, që nga varfëria e deri tek inekzistenca e shtetit përdori përsëri, siç bën çdo ditë e me këdo, dhunën e forcës së paligjshme të pushtetit.
Kryepërgjegjësi i shërbimeve ndaj qytetarëve dhe vendit, ju kërkoi bizneseve private të pastrojnë falas dëmet e tërmetit sipas formulës së prishjeve dhe pastrimit të Lanës.
Kujtojmë fare mirë se klientët e bashkisë së asaj kohe u angazhuan në prishjet e shëmtuara dhe të paligjshme të buzë Lanës e më pas u shpërblyen me xhunglën e betonit që ngritën si perandori të tyre cep më cep të Tiranës duke mos lënë mangët toka publike të parqeve, shkollave, kinemave të qytetit, pasurisë publike të shqiptarëve.
Kjo nuk është ndonjë zotësi qeverisëse, as kontribut vullnetarizmi por skemë e pastër mafie.
Të japësh 5 nga xhepi yt dhe të marrësh 100 nga xhepi i pasurisë së shqiptarëve nuk është filantropi por KORRUPSION !
Në rastin e Lanës, ky korrupsion i lindur pas pazarit të llojit mafioz, solli katastrofën urbane dhe sociale në kryeqytet, solli një xhungël betoni me pallate që plasën si mullarët e kashtës sapo ra tërmeti i parë.
Ky ishte modeli dhe shembulli si pjellë e mafias që pasurohej mbi pronat, të drejtat dhe financat e qytetarëve të thjeshtë.
Parimi i ndihmës e vullnetarizmit është një parim normal, i nevojshëm dhe mirënjohës moralisht.
Cilido që mundet dhe ka kapacitete duhet të kontribuojë vullnetarisht.
Por nuk mund të pranohen pazaret me fatkeqësitë nga njëra anë për të zhvatur pastaj pasuritë publike të shqiptarëve, nga ana tjetër.
Kur ky model ngrihet përmes kërcënimit të fuqisë së paligjshme të pushtetit që të fitojnë përsëri oligarkët, atëherë nuk kemi solidaritet dhe shërbim të shtetit !
Kjo është Mafie !
Paratë e shqiptarëve ndaj mblidhen nga taksat që rriten e shtohen përditë.
Që të përdoren përsëri për shqiptarët, për nevojat e tyre e kur atyre duhet tu shërbehet në nevojë.
Por në regjimin e sotëm, paratë nuk shkojnë tek ata por tek oligarkët.
Pse miliardat e konçensioneve korruptive nuk përdoren sot për hallin e shqiptarëve ?
Ato nuk u përdorën as dje për të pasur gati makineri, pajisje, mjete e njerëz për shpëtimin e qytetarëve nga fatkeqesitë që mund të vijnë, por për pasurimin korruptiv të oligarkëve që ndajnë hajninë me pushtetarët.
Ndaj ato nuk mund të përdoren as sot kur populli është nën fatkeqësi.
Tek shohim e dëgjojmë sot kryepërgjegjësin që na flet për modelin e Lanës shohim se si historia nis të përsëritet.
Historia nis të përsëritet sepse mafia e betonit dhe pushteti i korrupsionit nuk u hetuan e nuk u dënuan.
Sot mafia dhe korrupsioni janë më të fortë se në kohën e Lanës.
Por sot janë edhe motivi edhe arsyeja më të fortë për ti shpartalluar.
Kot të shpresojnë se do ketë Dvoran ti shpëtojë !
