Ministria e Jashtme e Shqipërisë, i ka përcjellë Beogradit një notë verbale, këto si pasojë e ofendimeve të ministrit të Mbrojtjes, Aleksandar Vulin. Në dokument shprehet indinjata e thellë ndaj gjuhës fyese, ndërsa kërkohet një reagim i autoriteteve shtetërore të Serbisë.
Në reagimin zyrtar thuhet se gjuha ofenduese dhe komunikimi i të pavërtetave në adresë të Republikës së Shqipërisë dhe kryeministrit Rama, nuk është mënyra e duhur për të zgjidhur mospajtimet politike.
“Gjuha ofenduese dhe komunikimi i të pavërtetave në adresë të Republikës së Shqipërisë dhe Kryeministrit të Republikës së Shqipërisë, z. Edi Rama, nuk është mënyra e duhur për të zgjidhur mospajtimet politike.
Për më shumë, publikimi i deklaratave të kësaj natyre në faqen zyrtare të Ministrisë së Mbrojtjes së Serbisë, i jep një karakter institucional qëndrimeve të Ministrit.
Me anë të kësaj Note Verbale, dënojmë gjuhën e përdorur dhe kërkojmë distancim të qartë dhe të hapur të autoriteteve shtetërore të Serbisë nga gjuha e Ministrit të Mbrojtjes, Aleksandar Vulin”.
