Pas dëmtimit të yllit të PSG-së Neymar, në miqësoren me Katarin ka reaguar edhe doktori i Kombëtares Braziliane, i cili shprehet se është stili i tij i lojës çfarë e bën lojtarin të dëmtohet më shpesh.
“Frakturat në kockat e shputës së këmbës dhe ndrydhjet e kyçit të këmbës nuk kanë lidhje direkte, por ndodhën në të njëjtin aksion, për fatin e tij të keq, por edhe për shkak të stilit të tij të lojës. Ai pëson faull, mundohet të shmanget dhe këmba e tij përdridhet, duke u sforcuar tej mase. Këtë radhë nuk i ndodhi asgjë në shputë, por pësoi një këputje në ligamente”, shprehet doktori i Kombëtares së Brazilit, Rodrigo Lasmar.
Doktori i cili e operoi futbollistin Neymar pas dëmtimit të vjetshëm të ligamenteve tha se plaga është përmirësuar dhe se nuk ishte kjo arsyeja për dëmtimin e tij.
“Neymar u frikësua shumë, pati ndjesinë se ishte dëmtimi për të cilin e operova vjet, por nuk kanë lidhje. Për 4 javë do jetë gati të luajë”, tha Lasmar.
Neymar gjatë miqësores dëmtoi kyçin e këmbës dhe koha e rikuperimit për këtë dëmtim do zgjasë 4 javë, duke bërë kështu që ylli brazilian të mos marrë pjesë në Kupën e Amerikës.
Ndeshjet për këtë kompeticion nisin më datë 14 qershor dhe trajneri i Brazilit, Tito është shprehur shumë i mërzitur për mungesën e yllit Neymar, duke e konsideruar atë si futbollistin e tretë më të mirë në botë pas Ronaldo dhe Messi.
