Drejtoresha e Institutit të Shëndetit Publik (ISHP), Albana Fico deklaroi se varianti indian i koronavirusit, Delta, është 40-60% më i transmetueshëm, dhe se një person i infektuar me këtë mutacion, mund të infektojë 3-4 persona.
Deklarata e Ficos u bë ditën e sotme në rubrikën ”Opinion” në News24. Sipas saj, personat të cilët nuk janë vaksinuar apo që kanë marrë vetëm një dozë, janë më të rrezikuar nga ky variant.
Ndër të tjera, Fico u shpreh se ende nuk ka asgjë zyrtare sa i takon prezencës së variantit Delta në vendin tonë.
Albana Fico: ”Të gjithë variantet e reja tregojnë një fytyrë, e cila mund të jetë më e rrezikshme ose më pak e rrezikshme. Delta është 40-60% më i transmetueshëm. Një person i infektuar me Delta mund të infektojë 3-4 persona, ndërkohë që me variantet e tjera ishte 1-2 persona. Kjo na bën të kuptojmë që personat që nuk janë vaksinuar, ose ata që kanë marrë një dozë, kanë një risk më të lartë se të tjerët për t’u infektuar. Sa i përket qarkullimit të Deltës në Shqipëri, kemi artikuluar që prej javës së shkuar faktin që kemi sinjale të pazakonta në ISHP nga mostra, që vijnë dhe përpunohen te ne. Është e rëndësishme ta themi këtë, sepse këtu është gjeneza e dyshimit të arsyeshëm. Tani që po flasim nuk kemi të identifikuar në ISHP një rast të tillë. Ka pasur mostra me sinjale të pazakonta, që janë grumbulluar për t’u dërguar në laboratorin e referencës në Gjermani”.
