Kryetari i Bindjes Demokratike, Astrit Patozi tregohet skeptik dhe e cilëson jorealist planin me pesë pika të opozitës së bashkuar propozuar nga kryedemokrati Lulzim Basha.
I ftuar në “Top Talk”, Patozi shprehet se plani ka rënë që në pikën e parë, ku kërkohet që reforma të udhëhiqet nga ndërkombëtarët, në një kohë kur ndërkombëtarët refuzojnë.
“Megjithë dëshirën e mirë për ta parë me dashamirësi këtë projekt, unë nuk mendoj se është realist dhe nuk mendoj që është i realizueshëm. Duket sikur PD po shtyn ditët e vendit, nuk i sjell vendit zgjidhje.
Është i parealizueshëm edhe nga mënyra se si kërkohet në mënyrë ultimative, kur tani nuk është momenti për ultimatume, por mbi të gjitha dhe nga përmbajtja. Ky i ashtuquajturi plan apo pakt ka rënë që në pikën e vet të parë, pasi kërkohet që reforma zgjedhore të udhëhiqet nga ndërkombëtarët të cilët kanë refuzuar”, tha Patozi.
Po ashtu, Patozi propozoi se duhet të përfshihet në ligj detyrimi për të votuar. Pasi, sipas tij do të rriste angazhimin politik të shqiptarëve, e për pasojë do të krijonte realitete të reja politike dhe do ta bënte më legjitime çdo qeveri të zgjedhur.
