Ministri i Brendshëm, Sandër Lleshaj shprehet se në Shqipëri ka nivel të krimit të organizuar, por, sipas tij, është i moderuar krahasuar me sofistikimin e krimit që njihet në nivel botëror.
I pyetur nëse ka grupe mafioze në vend, ministri përgjigjet se ka organizata kriminale, por jo deri në atë pikë sa mos t’u afrohet dikush.
“Numrat gabojnë, mund të thuash një numër dhe përgënjeshtrohet, mënyra më e mirë të biesh në përgënjeshtrim është të thuash një numër. Ka nivel të krimit të organizuar, por niveli në Shqipëri është i moderuar krahasuar me sofistikimin e krimit që njihet në nivel botëror. Kriminaliteti në Shqipëri ka filluar të zhvillohet në dekadat e fundit. Këtu bëhet fjalë për një krim që është në faza të moderuara të sofistikimit, sigurisht mjaft i rrezikshëm edhe në këtë nivel, mjaft. Por nuk ka arritur në atë nivel sa të shndërrohet në një nivel të madh drame saqë të mos mund t’i afrohet dikush. Nuk mund të them që Shqipëria ka mafie, ka grupe dhe organizata kriminale, por jo që ka mafie“, tha Lleshaj.
Kujtojmë se paraardhësi i tij, ish-ministri i Brendshëm, Fatmir Xhafaj thoshte se në Shqipëri ka 40 grupe kriminale të paprekshëm.
