Nënkryetari i Bashkisë Tiranë, Arbjan Mazniku tha se ndërtesa e teatrit të ri do të ndërtohet në të njëjtën hapësirë ku qëndronte godina e vjetër.
I ftuar në emisionin “Real Story” në News24, Mazniku theksoi se asnjë centimetër që i përket këtij institucioni nuk do të preket.
Sipas Maznikut, Instituti i monumenteve të Kulturës nuk e ka nxjerrë asnjëherë ‘monument kulture’ godinën e Teatrit Kombëtar. Ai shton se në vitin 2018 Instituti i Ndërtimit ka dalë në përfundimin se “objekti ka rrezik shembjeje”.
“Në 2004, Instituti i monumenteve të Kulturës, ka një listë të objekteve, ku thoshte; Teatri Kombëtar është objekt pa vlerë. Nuk e kanë nxjerrë asnjëherë ‘monument kulture’. Pra, thuhet në dokument; Teatri godinë pa vlerë. Në 2007 është PD në pushtet, instituti i Kulturës vendos; ky objekt nuk vendoset në listën e monumenteve të Kulturës. Në 2018-ën kemi një vlerësim nga Instituti i Ndërtimit që thotë; ‘objekti ka rrezik shembje, zjarri. Rindërtimi do të kishte kosto më të madhe se nga ndërtimi nga e para’. Në 4 lloj qeverish të ndryshme, kanë qenë konsistent se; ‘ky objekt nuk ka pasur vlerë’. Asnjë cm katrorë e sipërfaqes se teatrit nuk do të ketë asnjë funksion tjetër, përveç teatrit. 5200 metra tokë, do të jenë në shërbim të objektit të ri. Debati për tokën, përveç në kokën e disa njerëzve, nuk qëndron asgjëkund”, tha ai.
