Partia Demokratike ka reaguar në lidhje me përplasjen e fortë që pati kryeministri Rama me gazetarin Klevi Muka, teksa ishte në konferencë për mediat bashkë me ministren Olta Xhaçka. Në një dalje për mediat nga selia blu, sekretarja për marrëdhëniet me publikun, Jola Hysaj, theksoi se sjellja e Ramës me gazetarin është akti i paprecedentë. Ajo thotë se dënimi me riedukim i një gazetari, duke i ndaluar pjesëmarrjen për tre muaj në konferenca shtypi, është një akt i paprecedentë i marrëdhënieve media-qeveri në gjithë Europën. PD-ja i kërkon Ramës, që të heqë dorë nga komunikimi publik në konferenca për shtyp. Sipas kësaj force politike, kryeministri Rama nuk mund të kontrollojë dot veten në konferencat për media.
“Partia Demokratike përshëndet qëndrimin kurajoz të gazetarit të A2, Klevi Muka. Ne, dënojmë censurën dhe mospërmbajtjen etike e protokollare të kreut të Qeverisë. Dënimi me riedukim, duke i ndaluar pjesëmarrjen për tre muaj në konferenca shtypi, një gazetari, është një akt paprecedent i marrdhënieve media-qeveri në gjithë Europën. Të ngjashmit e këtij qëndrimi gjenden vetëm në Turqinë e Erdoganit, Rusinë e Putinit, Korenë e Veriut të Kim Yongut.
Partia Demokratike përshëndet reagimin e “Reporterëve pa kufij” pas incidentit në konferencën e djeshme të shtypit. Me këtë rast, u kërkojmë edhe organizatave të tjera të lirisë së shtypit, që të shtojnë presionin mbi një qeveri që nuk lejon gazetarët t’u bëjnë pyetje ministrave. Partia Demokratike u kërkon faktorëve relevantë ndërkombëtarë, të përfaqësuar në Tiranë, t’i bashkohen reagimeve kundër censures mediatike. Raportet e fundvitit nuk mjaftojnë. Kontradikta mes raporteve dhe qëndrimeve këtu në Tiranë, nuk bie në sy për mirë.
Në fund, ne i kërkojmë kryeministrit Rama të heqë nga komunikimi publik konferencën për shtyp. Monologu, dhe jo dialogu, është streha e tij. Duket qartë, që në konferencat për shtyp ai nuk mund ta kontrollojë veten, dhe as situatën. Kur një gazetar është në rrezik të mos-ushtrimit të profesionit, Shqipëria është në rrezik”.
