Moderatorja e emisionit “Tempora” në RTV Ora, Sonila Meço, ka shkëmbyer disa batuta thumbuese me kryedemokratin Lulzim Basha. Teksa ajo e pyet se për çfarë ka diskuar me ndërkombëtarët, të cilët po bëjnë takime të shpeshta me kreun demokrat, ky i fundit ia ka kthyer mjaft prerë, se nuk dëshiron që të japë detaje.
Kreu i PD-së është revoltuar shumë, kur gazetarja e ka ngacmuar në lidhje me njohjen e zgjedhjeve në 30 qershor. Sipas tij, kjo është e pamundur. Zgjedhjet sipas opozitës së bashkuar nuk do të mbahen, ndërsa iu drejtua me ironi Sonila Meços për të mos thyer etikën.
Debati
Sonila Meço: Çfarë diskutuat në takimin me të ngarkuarën me punë të Ambasadës Amerikane?
Lulzim Basha: Kam 15 vite që nuk komentoj takimet e mia me partnerët e huaj, asnjëherë. Është pjesë e etikës time politike.
Sonila Meço: A keni pasur presion për të hequr dorë nga aksionet e marra?
Lulzim Basha: E gjithë bota e ka parë, dëgjuar dhe lexuar që ajo që kemi denoncuar është jo vetëm e vërtetë, por edhe më e dhimbshme. Përmes një radiografie të përgjimeve, ne kemi një shtet të shkrirë me krimin. Padyshim. Bota perëndimore është e tronditur dhe e shokuar nga natyra kriminale e regjimit në fuqi. Është e qartë tashmë se çfarë rreziku përbën ky regjim për stabilitetin në vend, por dhe në rajon.
Meço: Në 1 korrik ata do të njohin zgjedhjet, në rast se ato bëhen sipas standardeve që ndërkombëtarët i konsiderojnë të pranueshme.
Basha: Kjo nuk është ajo që kam dëgjuar unë.
Meço: Çfarë keni dëgjuar ju?
Basha: Siç ju thashë, me gjithë talentin tuaj si gazetare, do ta keni të pamundur që t’më bëni të thyej etikën time.
Meço: Sapo dhatë përgjigjen, në fakt arrita t’jua marr. 2 heqim, 1 bëjnë, 1 Basha është një aritmetikë që nuk ndryshon me kohën sado talent gazetaresk të kem unë.