Seanca e sotme ka nisur me përplasje mes kreut të Kuvendit, Gramoz Ruçi dhe kreut të PD-së, Lulzim Basha.
Ka qenë kreu i PBDNJ-së, Vangjel Dule ai që ka kërkuar të hiqet nga rendi i ditës projektligji për pakicat.
Basha ka marrë fjalën dhe i ka kërkuar Ruçi që të zbatojë rregulloren dhe të mos përdorë shumicën e kartonëve për ta shkelur atë:
“Zoti Ruçi po e ktheni nga absurd, në qesharak e tragjik. Rregullorja fare qartë përcakton mënyrën e funksionimit. Detyra jote është të zbatosh rregulloren. Fatkeqësi e madhe për vendin është problemi i burrave e grave që nuk marrin mundimin të mendojnë.
Nuk mund ta ndryshosh rregulloren me votë, mësoje këtë, zbato rregulloren. Mos i vër kazmën. Ndoshta e ke porosi si javën e kaluar, por s´dua që seanca të përfundojë si herën e kaluar. Nuk je ti ai që fut dhe heq ligjet nga rendi i ditës, mësoje këtë. Mblidh institucionet e Kuvendit, siç e përcakton rregullorja”, deklaroi Basha.
Pas këtyre deklaratave, Ruçi ka hedhur në votim propozimin e Dules, duke bërë kështu që deputetët e mazhorancës të mos nxjerrin nga rendi i ditës projektligjin për pakicat.
Më pas, fjalën e ka marrë kryeministri Rama, i cili iu drejtua ashpër Dules, teksa tha ndër të tjera se ai thotë gjëra që Rama s’i ka thënë kurrë:
“Vangjel ti e ke bërë rrugë të më citosh gabim sa herë vë fjalët e mia në gojën tënde. Nëse nuk do të njihja do mendoja se e ke nga mendjeleshtësia, por duke të njohur them se po e bën qëllimisht.
Së pari ti je një minoritar dhe jo minoriteti. Evropa Vangjeli nuk është as kishë ku nuk vihet në diskutim zoti, e as xhami ku nuk vihet në diskutim Allahu, është kontinent ku ne jemi pjesë, fakti që nuk jemi në BE nuk na bën më pak evropianë dhe ne kemi të drejtën të themi për BE Vangjeli dhe kjo nuk përbën mëkat e arsye që zotrore të vish këtu e të më vësh mua në gojë gjëra që si kam thënë kurrë. Mësoji këto gjëra. Së fundi ligji është krenari për këtë Kuvend”, tha Rama.
