Gianni De Biasi nuk e harron asnjëherë Shqipërinë. Trajneri italian udhëhoqi Kombëtaren kuqezi në suksesin historik në Europianin 2016 dhe më pas mori edhe pasaportën shqiptare. Lëvizja e radhës e De Biasit vërteton se ai është një shqiptarë i vërtetë.
Ish-trajneri kuqezi ka qenë i pranishëm në takimin elektoral në Porderone për zgjedhjet lokale, ku nën siglën e Partisë Demokratike italiane do të garojë edhe shqiptari Roland Muka, trajneri ishte i ftuari i nderit në temën “Kur Sporti është Integrim”.
“Tashmë ndihem shqiptar”, përsëriti disa herë tekniku, ndërsa në monitor shfaqeshin edhe fotografitë e momenteve historike. “Në sytë e atyre djemve pashë dëshirën për të çuditur botën, dëshirën për të ndryshuar jetën. Shumë prej tyre ishin larguar nga vendlindja për të kërkuar fatin diku tjetër, në Zvicër, Gjermani apo Suedi”.
Ashtu si dhjetëra futbollistët kuqezi që shkëlqejnë në ligat më të forta europiane, edhe De Biasi është shembulli i suksesit kur sporti shërben për integrimin. Jo rastësisht kur ambasadori italian në Tiranë, Alberto Cutillo i dorëzoi titullin e lart të “Kavaljerit” dhe titullin e “Urdhrit të Yllit të Italisë” deklaroi se “De Biasi arriti ta dërgonte Shqipërinë në Europë përpara politikës”. Pas arritjes historike të kualifikimit në Kampionatin Europian “Francë 2016” trajneri ruan lidhjen e ngushtë me Shqipërinë dhe nuk nguron ta tregojë sa herë i jepet rasti.
