Që prej së martës së datës 6 prill, qeveria daneze ka filluar të heqë disa kufizime të vendosura për shkak të pandemisë së Covid-19, dhe të vërë në zbatim një plan që ndër të tjera parashikon rihapjen e vendit çdo dy javë.
Gjithashtu, po nga e marta ka hyrë në fuqi e ashtuquajtura “corona pass”, një certifikim, në formën e një aplikacioni në telefon apo të letrës klasike -që u jep mundësinë atyre që e zotërojnë atë që të hyjnë në dyqane të caktuara, dhe të kryejnë aktivitete të caktuara, të cilat janë të ndaluara për të gjithë të tjerët.
Certifikata në fjalë mund të merret nëse një qytetar danez i ka marrë të dyja dozat e vaksinës, nëse ka një rezultat negativ nga një test i kryer 72 orët e fundit, ose nëse tashmë e ka kaluar Covid-19. Në rastin e fundit, dokumenti është i vlefshëm që 2 javë nga testi i fundit negativ dhe deri për 10 javë të tjera.
Javët e fundit, disa vende kanë miratuar detyrimin e pajisjes së njerëzve me certifikata të ngjashme për njerëzit që duan udhëtojnë apo vijnë nga jashtë vendit. Edhe Bashkimi Evropian po vlerëson përdorimin e diçkaje të ngjashme për të lejuar udhëtime pa kufizime brenda unionit, sidomos në verë për t’i dhënë frymëmarrje sezonit turistik.
Ndërkohë,disa vende si Estonia apo Polonia kanë filluar testimin e “pasaportave të vaksinës”, edhe pse për momentin në një formë shumë të kufizuar. Gjithsesi, Danimarka është vendi i parë evropian që ka futur në përdorim një dokumenti të tillë,që lejon kategori të ndryshme njerëzish të marrin pjesë në aktivitete të veçanta.
Danezja “corona pass” – e ngjashme në disa mënyra me “Green Pass” të Izraelit – mund
të bëhet një model edhe për qeveritë e tjera evropiane, që po diskutojnë aktualisht se si të menaxhojnë rihapjet e vendeve të tyre dhe të rikthehen në normalitet pas valës së fundit goditëse të pandemisë.
Autoritetet daneze, thonë se “corona pass” është një masë e përkohshme, e cila do të përdoret derisa të vaksinohet shumica e popullsisë, domethënë deri pas verës. Shërbimet në dispozicion të atyre që e zotërojnë një dokument të tillë, varen nga relaksimi gradual i kufizimeve.
Për shembull, të martënu rihapën sallonet e parukierëve, artistëve të tatuazheve dhe autoshkollat. Atje mund të shkoni por vetëm duke paraqitur këtë kartë. Nga ana tjetër, nuk ka asnjë detyrim të tillë për shkollat dhe universitetet, të cilat u rihapën po të martën.
Nga 6 maj, do të jetë gjithashtu e mundur të shkohet në kinematë të mbyllura, teatrot, muzeumet dhe restorantet, ndërsa rihapja e madhe është planifikuar të ndodhë më21 maj, atëherë kur shpresohet të jenë vaksinuar gati të gjithë njerëzit mbi 50 vjeç.
Një nga problemet kryesore të kësaj nisme, është se kontrollet u janë besuar blerësve dhe menaxherëve në hyrje të bizneseve të tyre. Shumë prej tyre po ankohen se u janë ngarkuar përgjegjësi të tepërta. Në kryeqytetin Kopenhagë, ka pasur protesta nga grupe pak a shumë të organizuara,të cilat kanë filluar prej kohësh një fushatë kundër kufizimeve.
Kritikat burojnë edhe nga fakti që janë parashikuar ndëshkime të ashpra për ata që nuk respektojnë rregullat e reja të përcaktuara në certifikatë. Pronarët e dyqaneve rrezikojnë të gjobiten nga 400 në 6 mijë euro, ndërsa klientët përballen me një gjobë prej rreth 330 euro.
Deri tani pak më shumë se 13 për qind e popullsisë daneze ka marrë të paktën një dozë të vaksinës kundër koronavirusit, nga një total prej 5.8 milion banorësh, ndërsa 7 për qind i kanë marrë të dyja dozat.
Burimi i lajmit: https://www.ilpost.it/2021/04/07/danimarca-pass-coronavirus/
Përshtatur nga TIRANA TODAY
