Ambasadori i BE-së, Luigi Soreca deklaroi se do ta mbështesë planin ekonomik që po përgatitet nga qeveria për menaxhimin e situatës.
Gjatë fjalës së tij në konferencën e përbashkët me kryeministrin Rama, Soreca foli për një plan tjetër ekonomik dhe investimesh në muajin korrik.
Ambasadori tha se ky plan i BE-së do t’i vijë në ndihmë jo vetëm Shqipërisë, por të gjitha vendeve të rajonit.
“BE ka treguar një solidaritet të madh. Kemi qenë në terren për t’iu përgjigjur nevojave të menjëhershme. Dëshirojmë ta mbështesim Shqipërinë për rimëkëmbjen e vendit. Natyrisht që COVID-19 do ketë ndikim ekonomik kështu që plani që po përgatitet nga qeveria do ketë mbështetjen tonë. Në muajin korrik do kemi një plan ekonomik dhe investimesh që po përgatitet ndërkohë jo vetëm për Shqipërinë por gjithë rajonin për të ndihmuari institucionet të dalin nga kjo krizë”, tha ai.
