Kaosi i shkaktuar tek Partizani që solli edhe shkarkimin e Sulejman Starovës nga pankina, duket se nuk ka lënë pasoja tek të kuqtë. Klevis Dalipi e ka nisur me fitore aventurën e tij të re, ndonëse i kishte drejtuar të kuqtë edhe në takimet kur paraardhësi i tij Starova, ishte i pezulluar.
Kryeqytetasit mposhtën Luftëtarin në ‘Selman Stërmasi’, me rezultatin 3-0, duke I prishur gjirokastritëve serinë prej 11 ndeshjesh pa fitore dhe në njëfarë mënyre duke u hakmarrë për atë humbje 5-0 në Gjirokastër.
Kapiteni Batha zhbllokoi rezultatin në pjesën e parë për Partizanin, ndërsa Gerhard Progni dyfishoi shifrat në minutën e 71-të, pas një aksioni të bukur personal.
Në minutat e fundit ka vend edhe për Edgar Çanin, që u rikthye pas atij dëmtimi të gjatë dhe në topin e parë që preku, fitoi një 11-metërsh. Penalltinë e ekzekutoi Batha dhe shënoi duke vulosur shifrat 3-0.
Skënderbeu bëri detyrën ndaj Lushnjës, në Korçë, duke marrë një fitore me rezultatin 3-1 dhe duke shkuar në kuotën e 56 pikëve, në krye të tabelës së renditjes. Sowe, Dita dhe James shënuan për skuadrën e Dajës, ndërsa Sefa ngushtoi përkohësisht rezultatin për lushnjarët, në fundin e pjesës së parë.
