Tekniku Ilir Daja komenton sfidën r fituar 2 me 0 ndaj rivalit kryesorë për titull Partizanit, pavarësisht formës së dobët që ata kanë startuar kampionatin.
“Sot kemi qenë në të gjitha drejtimet goxha mira, edhe pse kam disa rezerva. Lojtarët kishin shpirt gare, dhe në vetëm pak raste ia lamë topin kundërshtarit. Kishim ndërtime të shpejta të lojës, bëmë gjithçka mirë dhe nëse do të shprehemi si sot, besoj se jemi në rrugën e duhur edhe pse jemi vetëm në javën e tretë. Ndaj Kamzës nuk na mungoi motivimi, por duhet edhe pak kohë që lojtarët e rinj të përshtaten me ekipin. Ky duhet të jetë Skënderbeu, sepse nuk mund të vecoj asnjë lojtar, të gjithë ishin shumë mirë. Partizani ka potencialin e duhur për të qenë rival i denjë, nuk ka bërë një start të mirë, sepse secili ekip do kohën e vet. Mbetet rival për rrugën e gjatë të kampionatit.
Kemi luajtur shumë mirë edhe kur kemi humbur 1-0 në Tiranë, por nuk kemi patur kaq shumë situata përpara portës. Sot ekipi ka funksionuar për 90 minuta. Kjo ka qenë një nga ndeshjet më të mirë përballë Partizanit. Nuk e humbëm për asnjë moment përqendrimin, ishim agresivë për rifitimin e topit, për të fituar dyluftimet dhe për të kapur zonat e sulmit sa më shpejt. Në pjesën e parë në zonën e golit në mbështetjen e lojtarëve që posedonin topin duhet të shkonim me më shumë lojtarë për të shënuar. Nespor do kohën e vet për të marrë minutazhin, por duke qenë se është në të njëjtin pozicion me Soëen, ky i fundit ka treguar se është zgjedhje e parë në rolin e qendërsulmuesit. Duhet punuar që të mund të luajmë edhe më dy sulmues. Rivaliteti mes të dyve, do të bënte që të jenë në maksimumin e tyre për të qenë të gatshëm që të luajnë njëkohësisht të dy. Do të thoja se Sowe është një hap para.”
Ndërsa tekniku Italian i Partizanit, Mark Iuliano shprehet se : “Ndeshja e sotme ishte e keqe sepse kishim ardhur këtu për një paraqitje të mirë, për të marrë rezultat pozitiv, por gjetëm një skuadër të fortë që arriti të fitonte ndeshjen. Na vjen keq që nuk bëmë atë që duhej. Patëm momente kur luajtëm mirë, por nuk bëmë atë që kishim menduar. Duhet t’i kërkojmë falje presidencës dhe tifozëve. Ndaj Laçit bëmë një gabim aksidental që në start, ndaj Kukësit luajtëm më mirë, ndërsa më Skënderbeun luajtëm keq. Duhet të vazhdojmë të punojmë dhe të mos e braktisim këtë projekt të rëndësishëm. Me lojtarët u përballa në dhomat e zhveshjes për të kuptuar se cilat janë motivet e kësaj paraqitjeje. Ndoshta këmbët nuk po na lejojnë të shfaqim cilësitë tona. I pyeta nëse kanë dyshime për atë që po bëjmë. Do të përpiqemi t’i bëjmë këta lojtarë të tregojnë se në ç’nivel mund të shkojnë. Ndryshimet ishin taktike, por lojtarët ishin të lodhur po humbisnin cilësi ndërsa Skënderbeu po sulmonte më shumë. Nuk janë zëvendësimet arsyeja që pësuam gol.
Të gjithë duhet të bëjmë më shumë, lojtarët kanë dëshirë dhe të përgatisësh ndeshjet me ta është e lehtë, por në ndeshje nuk po shprehen si duhet dhe janë të ngarkuar. Fola tani me djemtë nëse ka diçka që duhet të ndryshojmë, ata janë shumë të mërzitur dhe duan të punojnë siç po punojnë. Ndoshta nuk jemi ende gati për të treguar se cfarë skuadre është Partizanit. Janë djemtë që duhet ta tregojnë këtë, ndoshta kur të kemi formën fizike. Trajneri mundohet t’i bëjë lojtarët që të japin më të mirën. E provojmë por nuk është e lehtë. Është e lehtë të kritikosh sepse rezultatet nuk po vijnë.”
Përmbledhja e ndeshjes :
https://www.youtube.com/watch?v=b-IaQCo_524&ab_channel=SupersportAlbania
