Ilir Daja pas fitores që mori ekipi i tij përballë luftëtarit me rezultat 2-0, është shprehur i kënaqur dhe se vuajtën disi pasi shënuar shumë shpejt. Ai gjithashtu nuk mohoi faktin se e kishin më shumë mendjen tek ndeshja e Beogradit dhe prandaj mbajti disa rezerva. Daja është duke bërë një punë mjaft të mirë tek Skënderbeu duke qëndruar në vendin e parë, por duke treguar edhe një futboll bindës në arenën ndërkombëtare.
“Shënuam shumë shpejt dhe kjo solli një rënie të ritmit, ende pa filluar mirë ndeshja. Ishim përgatitur të përballeshim me një kundërshtar të vështirë dhe kështu rezultoi. Sot mund të them se vuajtëm disi në qendër të mesit të fushës, ku gjirokastritët na vinin në vështirësi dhe dilnin rrezikshëm. Jashanica nuk ishte në maksimumin e vet, ndërsa Gavazaj vinte pas dëmtimit, ndaj vendosa të mos i rrezikoja dhe t’i ruaja për t’i pasur të gatshëm në sfidën e Beogradit, ku do të kërkojmë të dhurojmë një paraqitje të mirë”, tha Ilir Daja.
Ndërsa nga ana tjetër Hasan Lika që pak ditë më parë ka marrë drejtimin e gjirokastriteve është shprehur i kënaqur me lojën që dhuruan lojtarët e tij dhe se u ndëshkuan shumë shpejt dhe kjo i tensionoi. Shprehet optimist për lojën që po tregon skuadra dhe shumë shpejt do të marrim edhe rezultatet që kërkojmë.
“Morëm një gol shumë të shpejtë dhe kjo kushtëzoi ecurinë e takimit, por më duhet të pranoj se luajtëm mjaftueshëm mirë dhe mund të vinim në vështirësi Skënderbeun. Sulmuam dhe krijuam raste mjaftueshëm, por nuk finalizuam, për të marrë rezultat. Sot më pëlqeu fakti që pashë një skuadër më të mirëvendosur dhe më bashkëpunuese në fushë. “Rëndësi ka që ky ekip arrin të prodhojë lojë. Për momentin po na mungon finalizimi dhe si rrjedhojë, edhe rezultatet, por jam optimist se shumë shpejt do të përmirësojmë edhe këtë aspekt”, tha Hasan Lika.
Luftëtari aktualisht mbanë vendin e parafundit në tabelën e klasifikimit me pikë të barabarta me Lushnjën dhe Vllazninë.
