Ditën e sotme është shënuar viktima e katërt nga koronavirusi në Shqipëri.
Bëhet fjalë për një 43-vjeçar i cili ishte shtruar në Spitalin Infektiv dhe ndodhej në terapi intensive.
Pas rëndimit të gjendjes gjatë mbrëmjes, 43-vjeçari nga Kavaja është vendosur në frymëmarrje të drejtuar (respirator) për disa orë, por pavarësisht përpjekjes së mjekëve, nuk ka mundur të mbijetojë.
Raportohet se 43-vjeçari nuk kishte sëmundje bashkëshoqëruese.
Ndërkohë pritet një informacion i përditësuar për koronavirusin në Shqipëri nga Ministria e Shëndetësisë.
Kjo e fundit herë pas here u rekomandon qytetarëve:
“Mos shkoni menjëherë në spital! Ministria ka vënë në dispozicion një linjë të gjelbër falas 0800 40 40 për çdo qytetar që kërkon informacon apo këshilla në lidhje me COVID-19.
Kjo linjë do të shërbejë edhe për pacientët kronikë që të marrin informacion se si të lidhen me mjekun e familjes, se si mund të përfitojnë barnat me rimbursim dhe për cdo shqetësim tjetër që ata kanë.
Por është e rëndësishme të sqarohet se: Nëse qytetarët kanë shenja të sëmundjes dhe për rastet e urgjencave duhet të telefonohet numri unik i urgjencës kombëtare 127!
Edhe një herë përsërisim apelin për qytetarët për të respektuar masat e distancimit social, të qëndrojnë në shtëpi, të ndihmojnë veten e tyre dhe në këtë mënyrë të ndihmojnë stafet mjekësor për të përballuar këtë situatë”.
