Që prej datës 8 mars edhe Shqipëria hyri në listën e vendeve të prekura nga COVID-19.
Me kalimin e muajve, situata shkoi drejt përmirësimit ndërkohë qeveria filloi të prezantonte masat lehtësuese.
Një ndër to është vendimi për rikthimin e besimtarëve katolikë në kisha nga kjo e hënë.
Mirëpo janë një sërë rregullash që duhen zbatuar.
Sakaq, ekspertët kanë kërkuar që të dezinfektohen ambientet e kishës dhe të ajrosen herë pas here.
“Të respektohet distanca, që është të paktën 1 – 1,5 metra. Por personat që janë të së njëjtës familje mund të rrinë së bashku. Nuk do të japim dorën, por mund të japim një buzëqeshje apo urim, pa u prekur me dorë.
Kanë ndryshuar edhe elementët e ceremonive fetare.
Meshtarët të parapëlqejnë kremtimet jashtë, kur e mundëson koha dhe të kihet parasysh që vendi i ujit të bekuar të jetë i zbrazur. Edhe kungimi të jepet në dorë. Edhe pse ka pasur kundërshtime, u kam thënë që fillimisht kështu bëhej kungimi, më pas, në Mesjetë, filloi të jepej në gojë”, u shpreh Arqipeshkvi i Shkodrës, Angelo Masaffra.
Kujtojmë se situata e pandemisë ka bërë që për më shumë se 2 muaj besimtarët katolikë të qëndrojnë larg objekteve të kultit.
