Koronavirusi shënon më shumë se 2400 raste dhe 50 të vdekur, në Shtetet e Bashkuara.
Ndërkohë sipas parashikimeve të CDS, Qendra për Kontrollin dhe Parandalimin e Sëmundjeve të SHBA, në qoftë se institucionet shtetërore dhe qytetarët nuk do të merrnin asnjë nga masat e këshilluara, viktimat e koronavirusit mund të shkonin nga 200 mijë deri në 1.7 milion persona.
Bilanci dramatik vijon dhe më tej, pasi deri në 21 milion persona do të duhet të shtroheshin në spital, duke kolapsuar spitalet amerikane, që disponojnë për momentin rreth 925 mijë shtretër.
Ky është niveli i fundit në katër nivele parashikimi, që tregon rrezikshmërinë e virusit dhe rëndësinë për një zinxhir masash shtrënguese në vend, që edhe pse disi me vonesë kanë filluar të zbatohen në çdo shtet amerikan, pas shpalljes së gjendjes së emergjencës kombëtare.
Kujtojmë se, Presidenti i Shteteve të Bashkuara të Amerikës, Donald Trump, ka shpallur emergjencën kombëtare për shkak të pandemisë së koronavirusit.
Trump theksoi se kjo gjë i jep akses tek 50 miliardë dollarë të gjitha shteteve dhe territoreve në luftën e përbashkët kundër kësaj sëmundjeje. /Opinion.al
