Kryeministri Edi Rama ka publikuar së fundmi në rrjetin social Facebook, pamjet e Tregut të Kombinatit, si ishte para pak ditësh, dhe si është aktualisht.
“Tregu i Kombinatit sot është kthyer nga sheshi për përsheshin e armikut që ishte të shtunën e shkuar, në një model të shkëlqyer vetëdijeje qytetare për përgjegjësinë e secilit në këtë luftë”, shkruan Rama.
Kreu i Qeverisë pohon se kjo luftë e koronavirusit ka vetëm një fund: “Fitoren e afërt të shqiptarëve”.
Reagimi i plotë i Ramës: “Ja që s’është punë fashe orare, po thjesht çështje durimi e rregulli.
*Tregu i Kombinatit sot është kthyer nga sheshi për përsheshin e armikut që ishte të shtunën e shkuar, në një model të shkëlqyer vetëdijeje qytetare për përgjegjësinë e secilit në këtë luftë⭐️⭐️⭐️⭐️⭐️
Kështu ka vetëm një fund kjo luftë: fitoren e afërt të shqiptarëve”.
Kryeministri ka njoftuar se nga e hëna, fasha orare do të zgjatet deri 17.30 dhe autorizimet për leje-dalje për pazar do të jenë 90 minuta.
Ndërkohë nga “dita e sotme në 13.00 deri të hënën në 05.00 gjithçka do të jetë e mbyllur dhe të gjithë në shtëpi”, udhëzon Rama.
Kujtojmë se në vendin tonë, si pasojë e COVID-19, kanë ndërruar jetë deri më tani 23 persona.
