Numri i rasteve të konfirmuara me koronavirus në Shqipëri ka shkuar në 51.
Pasi ka dhënë informacionin e mësipërm, Ministria e Shëndetësisë i ka bërë një apel të rëndësishëm 70-vjeçarëve.
Personat mbi 70-vjeç janë të lutur që të mos dalin nga shtëpitë e tyre, pasi rrezikojnë të preken nga koronavirusi.
Zëvendësministrja e Shëndetësisë Mira Rakacolli në një deklaratë për mediat pohoi se deri më tani numri i të prekurve ka shkuar në 51, ndërkohë që në Spitalin Infektiv ndodhen të shtruar 20 persona.
“Nisur nga sa ju informuam, dua të përsëris edhe një herë thirrjen për qytetarët: Telefononi në numrin 127!
Jepuni informacion të hollësishëm stafeve mjekësore! Nëse mbani të fshehtë informacionin e lëvizjeve tuaja nga personeli shëndetësor, rrezikoni të infektoni personelin dhe të afërmit tuaj.
SOT ËSHTË DETYRIM që të mbrojmë personelin shëndetësor.
Ju lutem qytetarë: Shmangni vajtjet direkte në spitale. Qëndroni në shtëpi! Respektoni rregullat e reja! Një thirrje sidomos për të moshuarit mbi 70 vjeç: Ju lutem mos dilni nga shtëpitë”, tha Rakacolli.
