Ministrja e Shëndetësisë dhe Mbrojtjes Sociale, Ogerta Manastirliu deklaroi se jemi ende larg fundit të pandemisë Covid-19, dhe se qeveria po merr masa për të parandaluar një valë tjetër në vjeshtë. Deklarata e Manastirliut u bë mbrëmjen e sotme në emisionin ”Real Story” në News 24.
Manastirliu u shpreh se prej 15 javësh Shqipëria është në një situatë të kontrolluar, pasi vaksinimi në vend nisi shumë shpejt. Sipas saj, virusi nuk është zhdukur potësisht, por qarkullon mes nesh.
Ministrja tha se vendi ynë ka dalë nga zona e riskut, teksa shtoi se deri më tani kanë mbërritur mbi 1 milion vaksina kundër koronavirusit.
Ogerta Manastirliu: ”Do ishte mirë sikur të thonim sot që ka ardhur vdekja e virusit, por nuk mund ta themi këtë. Ajo që themi është se prej 15 javësh Shqipëria është në një situatë të kontrolluar. Kjo për faktin se kemi një fillim të vaksinimit shumë shpejt. Por, edhe masat e targetuara përgjatë gjithë periudhës 15-mujore kanë dhënë rezultatin e tyre. Nuk mund të themi që Covid është zhdukur apo ka ‘vdekur’, pas ka ende një qarkullim. Sigurisht Shqipëria tashmë ka dalë nga zona e riskut, falë masave që janë marrë në kohë. Ne si vend kemi ndërmarrë hapa shumë të rëndësishëm në raport me luftën ndaj virusit, kryesisht me vaksinimin. Dy rastet e identifikuar sot janë raste me simptoma, që kanë rezultuar pozitivë. Ndërsa rastet që janë në spital, nuk janë të vaksinuara.
Janë dy zonja 61 dhe 67 vjeç, që janë në shërbimin Infektiv dhe po marrin shërbim, por nuk janë në situatë të rënduar. Për këtë bëj një apel për të gjithë qytetarët e pavaksinuar, që të mos humbasin kohë dhe të shkojnë në qendrat e vaksinimit. Te grupmoshat e vaksinuara shihet se ka rënë infektimi, ndaj dhe kjo tregon që vaksinimi po jep rezultate. Në Shqipëri kanë mbërritur mbi 1 milion doza, ndërsa në total kemi administruar mbi 970 mijë, bashkë me vaksinimet e kryera sot”.
