Drejtoresha e Institutit të Shëndetit Publik (ISHP), Albana Fico deklaroi se numri i rasteve aktive me koronavirus në vend, është rritur. Deklarata e Ficos u bë gjatë mbledhjes së sotme të Komitetit Teknik të Ekspertëve.
Sipas saj, situata epidemilogjike mbete e qetë, pasi incidenca e infektimeve është 5 për 100 mijë persona, teksa shtoi se në spitalet Covid, aktualisht po trajtohen 5 pacientë.
Sa i takon prezencës së variantit Delta në Shqipëri, Fico u shpreh se ende nuk ka një përgjigje zyrtare për mostrat e dyshuara.
Albana Fico: “Numri i rasteve aktive është rritur, por mbetemi në një incidencë 5 për 100 mijë persona, të shtruar në spitale COVID janë 5 pacientë, nuk kemi persona në reanimacion, numri i vdekjeve ka qenë zero për ditë me radhë, ndërkohë që për raportin e fataliteteve mbetet në 9.1% ka edhe një rritje të lehtë të pozitivitetit të mostrës. Efekt ka dhënë edhe vaksinimi. Nuk kemi një përgjigje për variantin Delta, e rëndësishme që përtej vaksinimit duhet të shohim me përparësi dhe të shohim masat e vendosura nga autoritete shëndetësore”.
Komiteti i Ekspertëve duke u bazuar në vijmësinë e procesit të vaksinimit, ka propozuar në zgjatjen e orarit të muzikës nga 22:00 në 23:00, ndërsa masat e tjera vazhdojnë të jenë në fuqi si kanë qenë më parë.
