Kreu i Urgjencës Kombëtare Skënder Brataj deklaroi se varianti indian i koronavirusit, Delta, nuk është agresiv, por ka një përhapje më të madhe. Deklarata e Bratajt u bë ditën e sotme në një intervistë për Report Tv.
Sipas Bratajt, ky variant ka një ngjashmëri me gripin, simptomat e së cilës janë dhumbja e kokës apo e fytit, rrufë dhe sekrecione. Ai paralajmëroi se një interpretim i gabuar i këtyre simptoma është me pasoja.
Ndër të tjera, Brataj tha se personat e vaksinuar, janë më pak të riskuar që të preken nga varianti ‘Delta’ dhe se zgjidhja e vetme është vaksinimi masiv i popullsisë.
Skënder Brataj: ”Që nga prilli i këtij viti me hyrjen e variantit ‘Delta’ dhe ka një ndryshim për sa i përket përhapjes dhe periudhës së inkubacionit, ka më shumë ngjashmëri me një ftohje normale, është me dhimbje koke, dhimbje fyti, rrufë dhe sekrecione dhe është i ngjashëm më ftohjen. Një interpretim i gabuar i këtyre simptomave është me pasoja. Nuk përsëritet simptoma e humbjes së shijes dhe nuhatjes që ishte tipike i variantit të parë COVID. Nuk është më agresiv, por ka një përhapje të madhe, pasi përhapet me rrugët e frymëmarrjes, nëse dikur duheshin 15 min në këtë kohë, flitet se koha është shumë e shkurtër në krahasim me më parë, mjaftojnë pak minuta të infektohesh dhe të përhapet virusi. Është tipike si gripi të shfaqen simptomat. Me shfaqjen e simptomave menjëherë duhet të bëni testin. Tipike është fakti që personat jo të vaksinuar janë shumë më të prekshëm nga ky variant. Duhet të ketë një pjesëmarrje masive për vaksinimin, i vetmi çelës i suksesit është vaksinimi në masë.”
Ndërkohë Instituti i Shëndetit Publik (ISHP), përgënjështroi lajmet që qarkulluan në disa media, se janë konfirmuar dy rastet e para me variantin Delta në Shqipëri, konkretisht në qytetin e Gjirokastrës.
ISHP bëri me dije se deri më tani nuk është indentifikuar asnjë rast me këtë variant në vendin tonë, pavarësisht numrit të lartë të testimeve.
“Instituti i Shëndetit Publik informon se deri tani në Shqipëri nuk është identifikuar asnjë rast i variantit Delta. Pavarësisht numrit të lartë të testimeve, nuk kemi sinjale për prezencën e këtij varianti në vendin tonë.
Instituti i Shëndetit Publik po monitoron me kujdes situatën e epidemisë së Covid19 në vend dhe për çdo rast të dyshuar, do të bashkëpunojë me institucionet e referencës, gjë e cila është pjesë e praktikës së punës së këtij institucioni”, thuhet në deklaratë.
