Në një konferencë për mediat, ish-kryeministri Berisha i ka kërkuar anëtarëve të Bordit të Transparencës për çmimin e karburanteve që të dorëhiqen. Berisha tha se ata janë duke i shërbyer oligarkëve përmes vendimit të tyre për çmimin e karburantëve.
“Bordet antikushtetuese janë shndërruar në megashushunjat e Ramës, të cilat po vjedhin, plaçkisin, grabisin çdo ditë qytetarët shqiptarë.
Mjafton t’u rikujtoj se çmimi i naftës dje në Maqedoninë e Veriut ishte 185 lekë, kundrejt 250 lekë në Shqipëri.
Çmim i tillë nafte nuk ekziston kund në Evropë dhe botë, përvecse në cifligun e Ramës që shpiku këtë mekanizëm duke dhunuar kushtetutën, ligjet natyrale të tregut, për të plackitur qytetarët e vet bashkë me klientelën e tij.
Të dhënat e politikave që ndoqi Rama ndaj shqiptarëve janë tepër alarmante.
Shqipëria nuk mund të ketë e asnjë vend i lirë s’mund të ketë borde që të kontrollojnë tregun për llogari të qeverisë.
Kërkoj ndërprerjen urgjente të veprimtarisë së tyre. U bëj thirrje anëtarëve të Bordit të japin dorëheqjen menjëherë. Të mos shndërrohen në një vegël anti kushtetuese të një qeverie që është organizatë kriminale”.
