Ministrja e Financave dhe Ekonomisë, Delina Ibrahimaj, i ka dalë në mbrojtje Bordit të Transparancës lidhur me çmimet që vendosin për karburantet në vend. Ministrja Ibrahimaj është shprehur se Bordi i ngritur për kontrollin e çmimeve është transparent. E pyetur në një konferencë për shtyp, përse Bordi nuk e ul çmimin e naftës, ndërkohë që në bursë ka shkuar në nivelet e para luftës, ministrja tha se ky mekanizëm i ngritur nuk përcakton çmimet e naftës bruto, po asaj të rafinuar.
“Unë besoj që ajo fjali që sapo thatë është supozim aspak i bazuar në realitet, është e kundërta. Ju ftoj të analizoni ecurinë e çmimeve të bursës për produktet që janë nën ombrellën e Bordit dhe jo të Bordit për naftën bruto që ka një lëvizje të ndryshme nga nafta e rafinuar.
Bordi për çmimet e naftës së rafinuar, benzinës e gazit e në asnjë rast Bordi nuk është mbledhur në kundërshtim me rritjen apo uljen e këtyre çmimeve.
Me pasqyrimin e një ulje të çmimeve në bursat ndërkombëtare për produktin që tregtohet në vend, Bordi mblidhet menjëherë ndërkohë që mundohet ta shtyjë mbledhjen kur kemi raste të rritjes së çmimeve në bursë. Vendimet janë transparente, dhe mos e dezinformoni opinionin publik”, tha ministrja.
