Kampionia e Europës Luiza Gega është kthyer sot në Shqipëri, pasi fitoi Medaljen e Artë për garën 3000 me pengesa në Kampionatin Europian në Mynih. Atletja Luiza Gega u shpreh se ka sakrifikuar prej vitesh për të arritur këtë fitore. Ajo ka falenderuar edhe trajnerin e saj, si mbështetësin më të madh.
“Feleminderit për këtë pritje të ngrohtë. Ndoshta jam lodhur shumë për të qenë këtu ku jam sot. Zgjodha të përfaqësoj ngjyrat e flamurit tim sa më shumë denjësisht, dhe jam shumë krenare.
Më në fund i tregova edhe Europës që edhe ne mund t’ia dalim. Nëse punon fort dhe nëse e do këtë vend, mund t’ia dalësh. Gjërat kanë ndryshuar vitet e fundit për sportin. Më kanë dhënë një shtysë më të madhe për të gjithë mbështetjen. Kam bërë të gjitha këto që të vijë kjo medalje. Jam shumë e lumtur që ia dola. Dhe të rinjtë shqiptarë mund t’ia dalin dhe kushdo që e do këtë vend. Vetëm nuk do t’ia kisha dalë nëse nuk do të kisha edhe mbështetjen e trajnerit”, u shpreh Luiza Gega.
Ajo u prit në aeroportin e Rinasit nga Ministrja e Arsimit dhe Sportit Evis Kushi dhe nga presidenti i KOKSH, Fidel Ylli.
Luiza Gega shënoi kohën 9’11”31, në një garë që e dominoi nga fillimi e deri në fund. Një rezultat i jashtëzakonshëm për Gegën dhe atletikën shqiptare, e cila u ngjit në majën e Europës.
