Nga: Ervis Iljazaj
Kryeministri Edi Rama, në Forumin e Convoco në Salzburg, ku foli për rrugëtimin e Shqipërisë në integrimin e Bashkimit Europian, ndër të tjera u shpreh se “Europa nuk po shkon mirë, por ne prapë e duam”.
Në fakt, kjo nuk është hera e parë që Kryeministri i Shqipërisë merr përsipër të analizojë ecurinë e Bashkimit Europian. Dhe sa herë i jepet rasti, nuk i kursen kritikat ndaj qeverisjes së Bashkimit Europian, sidomos në raport me politikat e tij për zgjerimin. Madje, moshapjen e negociatave me Shqipërinë ia faturon gjithmonë politikës nacionaliste dhe problemeve të brendshme të vetë politikës europiane dhe asnjëherë qeverisë dhe vendit të tij.
Sigurisht, që konteksti i brendshëm europian e ka penalizuar zgjerimin e mëtejshëm të Bashkimit Europian drejt Ballkanit Perëndimor dhe këto vite nuk kanë qenë momenti më i favorshëm për vendet që aspirojnë anëtarësimin në BE. Por, asnjë kontekst europian, i çfarëdo lloji, nuk mund të justifikojë periudhën 6-vjeçare në dështimin që ka pasur qeveria Rama në çështjen e çeljes së negociatave. E vërteta është se kjo qeveri ka pothuajse 6 vite që nuk bën asnjë hap përpara në çeljen e negociatave. Moshapja e negociatave në qershorin e kaluar e vërteton edhe njëherë dështimin total të qeverisë në raport me procesin e integrimit të Shqipërisë.
Qeveria dhe Kryeministri Rama pretendon se i ka bërë të gjitha detyrat e shtëpisë, por është politika europiane ajo që e ka në dorë dhe nuk e pranon hapjen e negociatave me Shqipërinë për arsyet e saj të brendshme dhe jo për faj të Shqipërisë. Kësaj here, Kryeministri kishte dy dhe jo një. Për të, moshapja e negociatave në qershor ishte jo vetëm faj i Europës, por edhe i opozitës shqiptare, e cila me krizën politike që krijoi, pengoi çeljen e negociatave. Ndërkohë që, hapja ose jo e negociatave, për nga natyra e procesit, që është tërësisht teknik, është sukses apo dështim vetëm i qeverisë dhe opozita, me aksionin e saj, ka një ndikim tepër të vogël në të.
Si mund të hapen negociatat me një vend, i cili në këtë moment që po flasim është praktikisht pa një rend kushtetues, ose në rastin më të mirë, me një rend kushtetues gjysma? Ku mungon Gjykata Kushtetuese, ku Parlamenti është në dyshim për nga legjitimiteti i tij, ku zgjedhjet lokale të qershorit nuk kishin aspak lidhje me kriteret politike që kërkon Bashkimi Europian. Po të shtosh këtu problemet ekonomike dhe shoqërore, atëherë do të ishte një mrekulli nëse Shqipërisë do t’i hapeshin negociata në qershorin e kaluar.
Në fakt, duke parë situatën, është Shqipëria ajo që nuk po shkon mirë, dhe jo Bashkimi Europian, ashtu sikurse u shpreh Kryeministri Rama.
Ndër të tjera, ekonomia e Bashkimit Europian në vitet e fundit, pas krizës financiare, është në rikuperim e sipër. Politikisht, pas zgjedhjeve të Parlamentit Europian, ideja e vazhdimësisë së Bashkimit Europian triumfoi. Kështu që, nuk ka asgjë për t’u shqetësuar për gjendjen e Europës në këto momente.
Por ka një problem edhe më të madh në qasjen që ka pasur Kryeministri Rama në raport me Bashkimin Europian, i cili ose ka ndodhur, për shkak se ende nuk e ka kuptuar se çfarë është Bashkimi Europian, ose si një strategji dëshpëruese për të fshehur dështimet me çeljen e negociatave në vitet e fundit.
E kemi dëgjuar shpeshherë Kryeministrin të shprehet publikisht se vendeve të Ballkanit Perëndimor i është sosur durimi, se nëse vonohen negociatat mund të rinisin konfliktet, se influenca ruse shtohet gjithmonë e më shumë nëse Europa largohet nga Ballkani, duke përdorur në këtë mënyrë një lloj “presioni” diplomatik për të detyruar vendet e BE-së që të pranojnë brenda tyre vendet e Ballkanit, përfshirë edhe Shqipërinë.
Kjo është një qasje totalisht e gabuar dhe aktet e kanë treguar se ka dështuar. Sepse Bashkimi Europian nuk është një organizatë diplomatike siç është për shembull NATO, ku Shqipëria u anëtarësua, edhe pse ndoshta nuk e meritonte. Bashkimi Europian është një sistem qeverisës i përbashkët, me ekonomi të përbashkët, me ligje të përbashkëta dhe standarde, të cilat janë njësoj për të gjitha vendet anëtare. Në këtë kuptim, “presionet” diplomatike që bën shpesh Kryeministri nuk kanë asnjë vlerë. Vlerë kanë vetëm nëse Shqipëria dhe qeverisja e tij realizon të gjitha standardet e qeverisjes së përbashkët të Bashkimit Europian. Në të kundërt, Shqipëria nuk ka për t’u anëtarësuar kurrë vetëm se Europa ka një nevojë gjeopolitike për Ballkanin Perëndimor. Sa më shpejt ta kuptojë këtë gjë Kryeministri i Shqipërisë, aq më mirë do të jetë për fatin e saj. /Gazeta Liberale
