Analisti i njohur Spartak Ngjela ka reaguar sa i përket memoriali të vendosur te Parku i Liqenit, në Tiranë, kushtuar viktimave të grushtit të shtetit në Turqi.
Përmes një statusi në Facebook, ai shprehet me nota të ashpra se marshimi i Ambasadës Turke ishte një veprim antishqiptar.
Ngjela deklaron se ai memorial duhet të hiqet menjëherë, teksa i drejtohet kryeministrit Rama që t’i japë përgjigje popullit shqiptar se për çfarë shërben ky “krim shtetëror”.
Postimi i plotë:
Ku e gjen të drejtën Ambasada e Turqisë për të bërë një marshim antishqiptar në Tiranë se na paska shpëtuar Erdogani nga një grusht shteti?
Ç’i duhet Shqipërisë dhe shqiptarëve është apo nuk është Erdogani në pushtet në Turqi! Shqiptarët as që duan t’ia dinë kë rrëzon Erdogani e kush kërkon ta rrëzojë Erdoganin.
Kryeministri Rama duhet të përgjigjet, në të kundër këtu ka një marrëveshje sekrete, e cila është krim shtetëror.
Deri tani shteti shqiptar nuk është përgjigjur. Ministria e Jashtme thotë “nuk di gjë”.
Po pse, çfarë është Shqipëria, një terra nullis, tokë e askujt?
Me që qeveria shqiptare nuk pranon të përgjigjet, sepse siç duket, e di veten një këshill mbretëror me fuqi absolute, është i detyruar t’i përgjigjet opinionit publik kryetari i Kuvendit të Shqipërisë: çfarë është ky memorial turk fyes për shqiptarët që vendoset në Tiranë?
Dhe të vendosë shkuljen e tij, sa më shpejt që të jetë e mundur.
