Saimir Çela: Çfarë tersi, e dija.
Renaldo Sula: E kanë marrë vesh ata? Qysh t’ia bëjmë?
Saimir Çela: Mos thuaj gjë.
Ky përgjim ambiental brenda ambienteve të policisë mes dy të arrestuarve për grabitjen e 9 Prillit në Rinas ka bërë hetuesit që të besojnë se dëshmia e të penduarit Alkond Bengasi ishte e vërtetë.
Deklarimet e këtij të fundit kanë bërë që hetuesit të zbërthejnë gjithë grupin. Dhe pasditen e kësaj të premteje policia i ka vënë prangat dhe të dyshuarit të 6, si pjesëmarrës në grabitje. Bëhet fjalë për një shtetas kosovar që u përshkrua nga Alkond Bengasi si “Daja”. Është 50-vjeçari Ragip Haxhiajdini.
Sipas dosjes hetimore të dorëzuar në gjykatë thuhet se 5 persona të veshur me kamuflazh hynë në aeroport. Për grabitësin e vrarë, Admir Murataj thuhet se i është gjetur një granatë dore e montuar me ndezës, granata tymuese, automatik me fishekë në fole dhe një aparat që shërbente për bllokimin e valëve.
I pari që është identifikuar si i dyshuar është Alkond Bengasi, i cili është tradhtuar nga një gjurmë gishti e zbuluar në mjetin “Chevrolet”. Bengasi tregon se ishte pyetur nga policia dhe për vrasjen e avokatit Ravik Gurra, e më pas Klementi i kishte shkuar në shtëpi. Duke e paralajmëruar të bënte kujdes, se mos policia i vendoste përgjues, Klementi i ka thënë: Do të dëgjosh një tronditje të madhe këto ditë!
“Vetëm pas grabitjes – shprehet Bengasi, – unë kuptova se në këtë ngjarje kishin marrë pjesë Admir Murataj dhe Klement Çala”. I dyshuari shpjegon se menjëherë pas ngjarjes kishte fikur telefonin, pasi kishte frikë.
Por edhe pse të shumë kërkuar, Klement Çala së bashku me Admir Muratajn kishin hapur një restorant te “Liqeni i Thatë”, një zonë në të cilën ishte shpërngulur edhe vet i dyshuari, pak muaj para se të ndodhte sulmi në aeroport.
