Në shqip përkthehet “Oborri i Skocisë”, por sot nuk ka fare lidhje me Skocinë. Scotland Yard është policia metropolitane, që menaxhon rendin dhe sigurinë në kryeqytetin britanik me mbi 7 milionë banorë.
Emërtimin e ka marrë nga emri i ndërtesës ku u vendos në fillim në vitin 1829. Themeluesi i saj, Richard Mayne, e përshtati shtëpinë e tij private me oborr si seli të kësaj force policore. Më parë aty ndodhej një ish-pallat mesjetar, që përdorej nga mbretërit skocezë. Scotland Yard, ka më shumë angazhime sesa thjesht patrullon në qytet.
Ajo ofron mbrojtje fizike për personalitetet e rëndësishme, teksa kryen edhe punë të fshehta detektive. Rasti më i vështirë për të ishin 11 vrasjet e kryera nga Xhek Rrjepësi në vitet 1888–1891, pa mundur që ta zbulojë deri më sot autorin e vërtetë. Në Scotland Yard punojnë sot më shumë se 30.000 oficerë policie. Vitet e fundit, detektivët e Scotland Yard, kanë arritur të parandalojnë disa sulme terroriste, duke arrestuar në kohë planifikuesit e tyre.
