Nga: Mentor Kikia
Fushata elektorale, sikundër duken bathët, do të jetë një paradë rrugësh të reja e rrugësh të pashtruara. Paradë peisazhesh të bukura, e fushash me plehra. Paradë kanalesh të bllokuara e tërë shkurre dhe kanalesh të pastruara.
Paradë shkollash të bukura nga jashtë dhe shkollash pa xhama. Paratë me çadra të pastrehësh dhe paradë me shtëpi të reja. Videoklipe kudo, në fshatra e qytete, do të mbushin rrjetet sociale dhe mediat. Qeveria që nuk do të lerë pllakë të shtruar pa reklamuar dhe opozita që nuk do të lërë gropë pa futur këmbët. Shqiptarët do të ftohen sërish të zgjedhin mes rrugës së re dhe gropës së pambushur.
Por, a është kjo ajo që u nevojitet sot shqiptarëve?
Pa asnjë dyshim, jo!
Këto histori kanë 3 dekada që na shoqërojnë. Populli e ka shpikur vetë emërtimin “asfalt elektoral” për investimet të minutës së fundit. Sepse me të tilla investime është joshur e genjyer çdo herë. Shqiptarët nuk kanë më nevojë për ti shtruar një copë rrugë, apo për tu rritur pagën 5% dy muaj para zgjedhjeve. Shqiptarët kanë nevojë të dëgjojnë për projekte serioze, afatgjatë, madhore.
Fermerët nuk duan thjeshtë plastmas me gjysmë çmimi, por projekte dhe konsulencë që do të çojnë në organizmin e tyre, modernizimin e bujqësisë dhe rritjen e konkurrueshmërisë në tregjet rajonale.
Nxënësit kanë nevojë jo vetëm për ndërtesa shkollash të bukura, por për rritjen e cilësisë së mësimdhënies. Mësuesit kanë nevojë për rritje pagash dhe investime në infrastrukturën didaktike.
Universitetet nuk kanë nevojë thjeshtë për zgjerime auditoresh, por për rritjen e cilësisë akademike dhe instalimin e kërkimit shkencor, pasi jemi vendi i vetëm në Europë, që nuk zhvillojmë asnjë lloj kërkimi shkencor në nivel universitar dhe jo vetëm.
Shëndetësia nuk ka nevojë për të shtruar pavionet me pllaka të reja, por për të shkatërruar rrjetën e merimangës së koncensioneve që e kanë shndërruar shëndetësinë publike në skllave dhe shtojcë të shëndetësisë private.
Naftëtarët nuk kanë nevoje për kafshatën e bukës dhe pagën e pamarrë, por për të rikthyer tek ata dhe tek i gjithë populli pasurinë kombëtare të grabitur me vendime qeverie.
Mjedisi nuk ka nevojë për vidoeklipe me mbjellje pemësh, por për projekte reale pyllëzimi, për të rikuperuar masakrën natyrore.
Dhe të gjithë sëbashku, kemi nevojë për një lufte reale kundër kurrupsionit, për ti dhënë fund formulave që shpiken për të vjedhur fondet publike dhe ligjeve që bëhen për të ligjëruar vjedhjen.
