Kryetarja e Lëvizjes Socialiste për Integrim, Monika Kryemadhi e kreu i grupit parlamentar, Petrit Vasili, kanë mbërritur në zyrën e kryetarit të Partisë Demokratike, Lulzim Basha pak minuta më parë.
Burime pranë Partisë Demokratike bëjnë të ditur se vizita e Kryemadhit te Basha vjen për dakordësimin e qëndrimeve të opozitës lidhur me çështjen “Tahiri”. Kërkesa e prokurorisë për heqjen e imunitetit të deputetit socialist do shoqërohet me dy raporte, ai i maxhorancës dhe i opozitës.
Kjo ka bërë që Partinë Demokratike dhe Lëvizja Socialiste për Integrim të riaktivizojnë kontaktet. Dy forcat politike të opozitës kërkojnë heqjen e imunitetit të ish-ministrit të Brendshëm dhe vendosjen e tij përpara drejtësisë për akuzat e Prokurorisë për trafik droge.
