Çështja Habilaj ka marrë vëmendjen e plotë të medias këto javë pas daljes së emrit të ish-ministrit të Brendshëm si të përfshirë në trafikun e drogës. Sot ishte seanca e parë ndaj të arrestuarve ku të gjithë u njohën me akuzat e prokurorisë. Gjykata e Rivlerësimit e Katanias mori në shqyrtim ankimimet e bëra nga 6 prej 7 të arrestuarve të të ashtuquajturit “Grupi Habilaj”, mbi të cilët rëndon akuza e trafikut ndërkombëtar të drogës.
Në një intervistë për Report TV, Biagio Maurizio Catalano avokati italian i Moisi Habilajt tregon se klienti i tij nuk e di çfarë përmban dosja, dhe ka qetësinë për të pritur se ku bazohet në detaje akuza dhe me pas për të vendosur strategjinë e mbrojtjes.
Avokati Catalano tregon se Moisi Habilaj është takuar në burg me xhaxhain e tij i cili ka shkuar nga shqipëria për ta takuar.
Habilaj doli sot para tre gjyqtarëve Iarato, Benanti dhe Catena të Gjykatës së Catanias, ndërsa Prokuroria bëri publike detaje nga dosja hetimore ku nënvizohet se grupi Habilaj ka trafikuar nga Shqipëria në drejtim të Italisë lëndë narkotike në vlerën e 20 milionë euro.
Por për lidhjet e Habilajve me ish-ministrin Tahiri, avokati Catalano, i cili është dhe avokati i Meridan Sulajt dhe Fatmir Minajt, nënvizon se një gjë të tillë nuk e ka parë në akte.
“Për këtë figurë, për ish-ministrin më kanë folur të tjerët por jo aktet. Mua nga aktet nuk më rezulton as edhe një presje. Ndaj objektivisht duhet të flas për një gjë që e kam dëgjuar nga jashtë procesit dhe jo brenda procesit. Mua s’më ka ndodhur ta takoj asgjëkund, nuk ekziston të paktën nga aktet që kam konsultuar unë. Por më duhet ta rithem, bëhet fjalë për një pjesë shumë të vogël të përmbledhjes, më pas në pjesën tjetër nuk e di se çfarë mund të ketë. Deri në këtë pikë, mua s’më rezulton asgjë për ndonjë autoritet politik apo ndonjë tjetër”, tha avokati Cataldo.
