Kolegji i Posaçëm i Apelimit (KPA), shkarkoi nga detyra prokurorin e Krimeve të Rënda Besim Hajdarmataj. Në vendim thuhet se Hajdarmataj ka cënuar besimin e publikut te sistemi i drejtësisë në një mënyrë të pariparueshme.
KPA pranoi kërkesën e Operacionit Ndërkombëtar të Monitorimit dhe Komisionerit Publik, duke zhbërë kështu vendimin e Komisionit të Pavarur të Kualifikimit.
“Hajdarmataj ka cënuar besimin e publikut te sistemi i drejtësisë në një mënyrë të pariparueshme, për këtë arsye vazhdimi i ushtrimit të funksionit të tij do të ishte i papërshtatshëm. Vendoset shkarkimi i tij nga detyra”, citohet në vendim.
Kolegji i Posaçëm i Apelimit ka dalë po ashtu në përfundimin se ish-prokurori i Krimeve të Rënda, ka mangësi në njohjen e ligjit.
Deklarim të pasaktë e të pamjaftueshëm për kriterin e pasurisë
Gjatë seancës së zhvilluar më 16 korrik në Kolegjin e Posaçëm e Apelimit, teksa u shpalosën konkluzionet, Hajdarmataj u akuzua se ka cënuar rëndë besimin e publikut te sistemi i drejtësisë. Sa i përket pasurinë, prokurori Hajdarmataj u akuzua se ka kryer deklarim të pasaktë e të pamjaftueshëm për kriterin e pasurisë, dhe nuk e justifikon atë.
Mangësi profesionale
Sa i takon integritetit dhe formimit profesional, Komisioneri Publik theksoi se në pesë çështje të verifikuara, ku në disa raste Hajdarmataj ka qenë në rolin e prokurorit dhe në raste të tjera është vlerësuar në cilësinë e drejtuesit, paraqitën mangësi profesionale. Të gjithë këto shkelje, bëjnë që të jetë i pamundur konfirmimi në detyrë të Hajdarmatajt.
Konstatimet e Komisionerit u mbështetën edhe nga vëzhguesi ndërkombëtar Theo Jacobs gjatë seancës së 8 korrikut, i cili e konsideroi të turpshme moskryerjen e hetimeve për tonelata drogë nga ish-Prokuroria e Krimeve të Rënda, kur drejtohej nga Besim Hajdarmataj.
Besim Hajdarmataj e ka filluar karrierën në sistemin e drejtësisë në vitin 1999, dhe përgjatë 20 viteve, ai ka mbajtur poste drejtuese në Prokurorinë e Tropojës dhe të Kurbinit.
