Kryeministri grek, Kyriakos Mitsotakis, në një letër që ka i ka dërguar OMONIA-s, thotë se respektimi i të drejtave të minoritetit grek në Shqipëri, përbën kusht paraprak për çeljen e negociatave të Shqipërisë me BE-në.
Mitsotakis citon përkushtimin e shtetit fqinj dhe të tijin personal, për të mbrojtur të drejtat e minoritetit grek.
“Shqetësimi kryesor i qeverisë greke dhe i imi personal, është mbrojtja me efikasitet i të drejtave minoritare dhe të pronës të minoritetit kombëtar grek në Shqipëri, ç’ka edhe përbën kusht paraprak për hapjen e negociatave të integrimit të Shqipërisë në Bashkimin Evropian”, shkruan kryeministri i Greqisë.
Mitsotakis e mbyll letrën duke thënë se Greqia do të jetë gjithmonë në krah të minoritetit helen, duke e mbështetur atë, por edhe për të përmirësuar marrëdhëniet greko-shqiptare në përgjithësi.
