Kreu i Komisionit Qendror të Zgjedhjeve, Ilirjan Celibashi, ka marrë një pyetje ngacmuese nëse do ishte i gatshëm të linte postin për të kandiduar për President. Celibashi tha se kushdo do ndihej i përkëdhelur nga kjo gjë, por nënvizoi se kjo nuk është ambicia e tij.
“E dëgjoj për herë të parë. E di që gjithkush mundet të përkëdhelej nga kjo gjë. Unë nuk ndihem fare i përkëdhelur. Nuk është ambicia ime”, deklaroi Celibashi.
Dje, deputetët socialistë hodhën në kuti zarfet me tre emra për Presidentin e ri, ndërkohë që kryeministri Edi Rama e ka shfrytëzuar mbledhjen e grupit parlamentar të Partisë Socialiste për të kritikuar kundërshtarët. Rama, në fjalën e tij theksoi disa herë se në krye të shtetit duhet një njeri normal, duke shigjetuar vazhdimisht Ilir Metën, të cilin e quajti skandaloz.
“Ajo çka e bën këtë moment shumë përcaktues për karakterin dhe profilin e PS, është se nuk mjafton thjeshtë të zgjedhim një person që do të ishte më i përshtatshëm për atë rol sesa Ilir Meta.
Por, është që të zgjedhim një figurë që të ketë integritet, që të garantojë respekt të ndërsjellë, që të sigurojë një nivel profesionalizmi në adresimin e të gjithë gamës së çështjeve që lidhen me Presidentin sikundër edhe të përçojë një frymë.
Këtu sfida vështirësohet dhe këtu përzgjedhja është shumë më e ngushtë sesa çdo të ishte në një sy të parë përzgjedhja e një pasuesi të Presidentit më skandaloz që ka njohur historia e atij institucioni dhe më të papërsëritshëm në llojin e vet që Shqipëria ka pasur rastin ta këtë mbi krye”, tha ai.
